ىقىلاستى قۇتتىقتاۋلار, ىزگى تىلەكتەر

بۇگىنگى كۇن – ەل تاريحىنداعى بەلەستى كۇندەردىڭ ءبىرى.

بۇگىن قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ قىزمەتىنە رەسمي كىرىسۋىنە وراي سالتاناتتى ۇلىقتاۋ ءراسىمى وتكىزىلەدى.

قازاقستان پرەزيدەنتى نۇرسۇلتان نازارباەۆتىڭ اتىنا مەملەكەت, ۇكىمەت باسشىلارىنان, حالىقارالىق ۇيىمداردىڭ جەتەكشىلەرىنەن سايلاۋداعى جەڭىسىنە بايلانىس­تى قۇتتىقتاۋلار كەلىپ تۇسۋدە مەملەكەت باسشىسى نۇرسۇلتان نازار­باەۆ قىتاي حالىق رەسپۋبليكاسىنىڭ ءتورا­عاسى سي تسزينپينمەن تەلەفون ارقىلى ءسوي­لەستى, دەپ حابارلادى پرەزيدەنتتىڭ ءباسپاسوز قىزمەتى. سي تسزينپين نۇرسۇلتان نازارباەۆتى 26 ءساۋ­ىر­دە وتكەن سايلاۋداعى جەڭىسىمەن قۇتتىق­تادى. قىتاي باسشىسى قازاقستان پرەزيدەنتىنىڭ تاۋەلسىزدىكتى نىعايتۋعا جانە قازاقستاننىڭ ور­نىقتى دامۋىنا قوسقان ۇلەسىن جوعارى باعالادى. مەملەكەت باسشىلارى اڭگىمە بارىسىندا ەكىجاقتى ىنتىماق­تاس­تىق­تىڭ الەۋەتى جوعا­رى ەكەنىن ايتىپ, «نۇرلى جول» جانە «ءجى­بەك جولىنىڭ ەكونوميكالىق بەلدەۋى» باعدار­لا­ما­لارىنىڭ ءوزارا تولىقتىرۋشى سيپاتىن اتاپ ءوتتى. سونىمەن قاتار, تاراپتار وڭىرلىك جانە حالىق­ارالىق وزەكتى ماسەلەلەرگە قاتىستى ەكى ەل­دىڭ ۇستانىمدارى ۇقساس ەكەنىنە نازار اۋداردى. سوڭىندا سي تسزينپين قازاقستان پرەزي­دەن­تىن بيىل قىتايعا ساپارلاپ كەلۋگە شاقىر­دى. تەلەفون ارقىلى سويلەسۋگە قىتاي جاعى باستاماشى بولدى. * * * مەملەكەت باسشىسى نۇرسۇلتان نازار­باەۆتىڭ اتىنا ونىڭ قازاقستان رەسپۋب­ليكاسى پرەزيدەنتى بولىپ سايلانۋىنا باي­لانىستى تۇرىك رەسپۋبليكاسىنىڭ پرەزي­دەنتى رەدجەپ ەردوعاننان قۇتتىقتاۋ جەدەل­حاتى كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى. رەدجەپ ەردوعان تۇرىك حالقىنىڭ جانە جەكە ءوزىنىڭ اتىنان نۇرسۇلتان نازارباەۆتى پرە­زيدەنتتىك سايلاۋداعى جەڭىسىمەن قۇتتىق­تادى. – قازاقستان ءسىزدىڭ باسشىلىعىڭىزبەن حالىقتىڭ ءال-اۋقاتىن كوتەرۋگە باعىتتالعان باستامالارىن تابىستى جالعاستىراتىنىنا سەنىمدىمىن. ءبىزدىڭ ەلدەرىمىزدىڭ اراسىنداعى تىلدىك, مادەني جانە تاريحي بايلانىستاردىڭ ورتاقتىعىنا نەگىزدەلگەن ستراتەگيالىق سەرىكتەستىك بۇدان ءارى دە حالىقتارىمىزدىڭ يگىلىگى ءۇشىن, سونداي-اق, وڭىردەگى بەيبىتشىلىك پەن تۇراقتىلىق ءۇشىن دامي بەرەتىنىنە تاعى دا سەنىم بىلدىرەمىن, – دەپ اتاپ وتىلگەن جەدەلحاتتا. سونىمەن قاتار, رەدجەپ ەردوعان تاياۋدا قازاقستانعا جاساعان ساپارى كەزىندەگى جىلى قابىلداۋ مەن قوناقجايلىق ءۇشىن مەملەكەت باسشىسىنا ريزاشىلىعىن بىلدىرگەن. سوڭىندا تۇركيا پرەزيدەنتى ەلباسى نۇر­سۇلتان نازارباەۆقا مىقتى دەنساۋلىق, باقىت, تابىس, ال قازاقستان حالقىنا باق-بەرەكە تىلەدى. * * * ەلباسى نۇرسۇلتان نازارباەۆ ما­لاي­زيا پرەمەر-ءمينيسترى نادجيب تۋن را­زاك­پەن تەلەفون ارقىلى سويلەستى, دەپ حا­بارلادى پرەزيدەنتتىڭ ءباسپاسوز قىزمەتى. نادجيب تۋن رازاك نۇرسۇلتان نازارباەۆتى 26 ساۋىردە وتكەن قازاقستان رەسپۋبليكاسى پرە­زي­دەنتىنىڭ سايلاۋىنداعى تاريحي جەڭىسىمەن قۇتتىقتادى. اڭگىمە بارىسىندا ەكى ەلدىڭ باسشىلارى ساياسي, ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتى ودان ءارى نىعايتۋ ماسەلەلەرىن ەگجەي-تەگجەيلى تالقىلادى. تاراپتار ەكى مەملەكەتتىڭ وڭىرلىك جانە حالىقارالىق وزەكتى ماسەلەلەر بويىنشا ۇستانىمدارى ۇقساس ەكەنىن اتاپ ءوتتى. تەلەفونمەن سويلەسۋگە مالايزيا تاراپى باستاماشىلىق ەتتى. * * * مەملەكەت باسشىسى نۇرسۇلتان نازار­باەۆتىڭ اتىنا ونىڭ قازاقستان رەسپۋب­ليكاسى پرەزيدەنتى بولىپ سايلانۋىنا بايلانىستى رەسەي فەدەراتسياسى ۇكىمەتىنىڭ توراعاسى دميتري مەدۆەدەۆتەن قۇتتىقتاۋ جەدەلحاتى كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى. دميتري مەدۆەدەۆ نۇرسۇلتان نازار­باەۆتى پرەزيدەنتتىك سايلاۋداعى  جەڭىسىمەن قۇتتىقتادى. – سايلاۋداعى ايقىن جەڭىس ءسىز جۇرگىزىپ وتىرعان ستراتەگيالىق باعىتتى قازاقستان حال­قى­نىڭ كەڭ قولداۋىنا نەگىزدەلگەنىن كورسەت­تى. ءسىزدىڭ باسشىلىعىڭىزبەن رەسپۋبلي­كا الەۋمەتتىك-ەكونوميكالىق دامۋ جانە ازا­ماتتاردىڭ ءال-اۋقاتىن ارتتىرۋ باعىتىندا العا ىلگەرىلەۋىن جالعاستىراتىنىنا سەنىمدىمىن, –  دەلىنگەن جەدەلحاتتا. رەسەي پرەمەر-ءمينيسترى قازاقستاندىق سەرىكتەستەرىمەن كووپەراتسيالىق بايلانىستاردى دامىتۋ ءۇشىن جاڭا مۇمكىندىكتەر اشاتىن ەۋرازيالىق ەكونوميكالىق وداق اياسىنداعى ءوزارا ىقپالداستىقتى جانداندىرۋعا ءازىر ەكەنىن ءبىلدىردى. – ءبىز ءسىزدىڭ رەسەي مەن قازاقستاندى بىرىكتىرەتىن دوستىقتى, تاتۋ كورشىلىك پەن  سەرىكتەستىكتى نىعايتۋعا, ءتۇرلى سالالارداعى اۋقىمدى ەكونوميكالىق جوبالاردى جۇزەگە اسىرۋعا قوسقان زور ۇلەسىڭىزدى باعالايمىز, – دەپ اتاپ وتىلگەن جەدەلحاتتا. سوڭىندا دميتري مەدۆەدەۆ قازاقستان پرەزيدەنتىنە مىقتى دەنساۋلىق, اماندىق جانە مەملەكەتتىك قىزمەتىنە تابىس تىلەدى.